|
Entela Hysko vajza qe humbi jeten bashke me Dritan Hoxhen e "Top-Channel"
|
Shtëpia e Entela Hyskos, vajzës 28-vjeçare që humbi jetën para katër ditësh në aksidentin tragjik bashkë me pronarin e "Top Media", ndodhet në katin e parë të një pallati në hyrje të Tiranës, poshtëëë varrezave "Dëshmorët e Kombit". Të afërmit e saj na thonë se prindërit e saj kanë ardhur para dy vjetësh nga Skrapari dhe e kanë blerë këtë shtëpi për të jetuar bashkë me vajzën e tyre, Entelën. Dhimbja dhe pikëllimi ka përfshirë të gjithë familjarët që vazhdojnë të presin njerëz për ngushëllime. Lotët ende nuk janë tharë në sytë e nënës së saj, Nazimesë, që ende nuk e beson ikjen në botën tjetër të vajzës së saj. Ajo përkëdhel një fotografi të Entelës që e mban në prehër dhe lotët i rrjedhin papushim. Pranë ka bashkëshortin, Bariun, djalin e vetëm që ka ardhur nga Anglia ku jeton si emigrant, dhe vajzën tjetër, e cila ndodhet në Greqi me familjen e saj. Disa gra veshur me të zeza i qëndrojnë pranë për t'i lehtësuar dhimbjen. "Më iku vajza, më iku drita e syve", flet ngadalë nëna e Entelës dhe përkëdhel portretin e saj në një kornizë të madhe. Ajo thotë se tani jeton vetëm me kujtimet e Entelës dhe të gjitha ato gjëra që ajo ka lënë në shtëpi.
Më pas, nënë Nazimeja nis e tregon për çastet e fundit kur ishte ndarë me Entelën. "Një natë para se të më ikte përgjithmonë, kam fjetur në një shtrat me të. Burri kishte ikur në Skrapar dhe ne fjetëm bashkë nënë e bijë. Gjithë natën nuk e zinte gjumi dhe më puthte duart. Nuk e di, por sikur ndjente diçka. Në mëngjes iku në punë, si gjithmonë. Më tha se, do të vij vonë në shtëpi, sepse do të shkoj për urim në një dasmë, por t'i mos u mërzit se do të vij në shtëpi në darkë. Në drekë, Entela më mori në telefon dhe më pyet se çfarë po bëja. Unë e pyeta, a hëngre drekë, e ajo më tha se, "tani po ha atë që më përgatite ti". Më mori në telefon edhe një herë pasdite dhe më tha mos u mërzit se do të vij në darkë. Në fakt kjo ishte dhe telefonata e fundit e Entelës dhe ishte hera e fundit që dëgjova zërin", thotë e ëma e Entelës, Nazimeja, duke shpërthyer në të qara.
Entela Hysko ka lindur më 5 korrik 1980 në Çorovodë të Skraparit. Shkollën fillore dhe 8-vjeçare i mbaroi në vendlindje. Shkollën e Mesme të Përgjithshme e mbaroi në gjimnazin "Arben Broci" në Tiranë. Ka përfunduar Fakultetin e Akademisë së Arteve për aktrim dhe më pas Specializimin për regjizurë.
Në dhjetor të vitit 2007, Entela Hysko ka qenë e ftuar nga fotografi me famë botërore Fadil Berisha në SHBA për një album fotografik. Atje është takuar edhe me shkrimtarin e shquar shqiptar Ismail Kadare, ku ka pozuar edhe me bashkëshorten e tij, Elena Kadare. Gjithashtu, ka qenë e ftuar edhe në Itali ku ka pozuar në një nga studiot më të njohura italiane.
Nëna e saj, Nazimeja tregon se, Entela ka punuar më shumë se dhjetë vjet në "Top Albania Radio" dhe "Top-Channel". Ajo thotë se, ka punuar me përkushtim dhe pasion në këto media, por njëkohësisht shpreh keqardhje se nuk i kanë shkuar për ngushëllim drejtuesit e këtyre mediave dhe shoqëria e punës. "Vajza ime ka punuar në "Top-Channel", që kur ishte në shkollën e mesme, "Arben Broci" në Tiranë e deri në ditën e fundit të jetës, por ata nuk erdhën për ngushëllim", thotë nëna e Entelës. Ajo thotë se ka pritur me shpresë se do të vinin për ngushëllim njerëzit e punës ku ajo punoi për më shumë se dhjetë vjet, por nuk ndodhi kështu. "Më ka mbetur peng se, vajza ime ka punuar për dhjetë vjet me korrektësi, bile ka qenë në poste drejtuese, por nuk u vlerësua prej tyre", thotë nënë Nazimeja. Mbesa e saj thotë se, ka qenë për ngushëllim Arbana Osmani, drejtuesja e emisionit "Big-Brother" dhe nuk ka pushuar asnjë çast së qari.
Nazimeja tregon se, Entela kishte në plan për të bërë një film vetë, por nuk na tregoi se çfarë filmi. "Do t'ua bëjë surprizë, më thoshte, dhe lexonte dhe shkruante deri natën vonë. Shumë dorëshkrime të saj janë aty në sirtar", thotë ajo. Njerëzit e saj të afërt tregojnë se, Entela ka qenë anëtare e komisionit të përzgjedhjes së anëtarëve që po marrin pjesë në spektaklin "Big Brother", që po transmetohet nga "Top-Channel". Gjithashtu ajo ka organizuar disa spektakle në këtë televizion. "Entela ishte e dashur me të gjithë njerëzit që nga të vegjëlit e deri tek të moshuarit", thotë nëna e saj.
................
TOP censura e vdekjes
Mëngjesin e datës 23 Maj 2008, vdiqën në një aksident presidenti i "Top Medias", Dritan Hoxha, dhe punonjësja e "Top Medias", 28-vjeçarja Entela Hysko. Kryetari i Partisë Demokratike të Shqipërisë u shprehu të dy familjeve ngushëllimet më të sinqerta dhe solidaritetin njerëzor më të lartë. Sërish, Partia Demokratike u shpreh familjeve të të dy viktimave ngushëllimet më të thella. Sipas John Dane, vdekja e çdo njeriu të pakëson, sepse i përket njerëzimit.
Por, Partia Demokratike, si parti e fjalës së lirë, që nxori vendin nga censura dhe terri informativ më i egër komunist, e konsideron heshtjen, fshehjen apo censurën totale nga "Top Media" dhe disa simotrave të saj të lajmit të vdekjes tragjike të bashkëpunëtores së tyre, Entela Hysko, si një akt primitiv, çnjerëzor dhe të pashembullt.
Partia Demokratike u kujton këtyre censorëve të rinj se vdekja e një njeriu në një shoqëri të lirë, nuk mund të jetë kurrë sekret. Vdekjen e një njeriu mund ta mbajnë sekret vetëm diktaturat më mizore dhe shpellat e Al Kapones. Mirëpo, punonjësja e "Top Channel"-it, 28-vjeçarja Entela Hysko, nuk vdiq në Korenë e Veriut, as dhe në skutat Sakra Korona Unita, por ajo vdiq në mes të bulevardit të Tiranës, së bashku me idhullin tuaj, për të cilin u veshët me të zeza, derdhët lot, hodhët me qindra karafila dhe asnjë për Entelën, që e gjallë do të derdhte ndoshta lotë më shumë se ju për padronin tuaj. Kishte dhe ajo një nënë, që ndoshta ju kishte pritur shumë herë, një baba që nuk ishte biznesmen, por ishte emigrant.
Ajo ishte një vajzë shqiptare, bashkëpunëtore e juaja, që kishte ndarë me ju festime, hidhërime dhe gëzime, ndërsa ju nuk guxuat as për së vdekuri të shqipëronit emrin e saj. Ju qofshit! Entela bëri vetëm një gabim, që vuri këmbën në makinën e pronarit tuaj, por këtë ajo e pagoi me jetën e saj të re, kurse ju menduat se do të mund të mbulonit, të fshihnit vdekjen e saj me terrin informativ, me censurë. Ju, në këtë mënyrë, censuruat aktin më madhor, më sublim të njeriut, censuruat lajmin më tragjik të të gjitha lajmeve, atë të vdekjes së një njeriu, censuruat lajmin e vdekjes së shoqes suaj. Ju qofshit, Zoti ju ndjeftë! Keni kryer një akt profanie të tmerrshëm, keni përdhosur kodin e vdekjes. Jo vetëm varrin, por edhe kufomën e shoqes suaj. Nga skifter të fjalës së lirë që duhet të ishit, u shndërruat në kukuvajka të zeza të mjerimit të saj. Al Kapone do t'ju kishte dekoruar me urdhrin më të lartë të sojit të tij, kurse për të gjithë ata që i thonë lirisë liri, nënës nënë, vajzës vajzë, ju që censuruat këtë lajm, keni dëshmuar me aktin tuaj barbar, çnjerëzor, se jeni kulmi i censurës, top turpi apo turp media.
Në rast se në ndërgjegjen tuaj ka mbetur qoftë edhe një grimcë njerëzore, bëhuni njerëz e i kërkoni ndjesë publike ish-shoqes suaj, kërkojini ndjesë familjes së saj, kërkojini ndjesë Entela Hyskos! Sado që të mos e keni dashur, ajo nuk është më. Kërkojuni ndjesë të gjithë shqiptarëve që e kanë të shenjtë lirinë e fjalës, që e kanë të paprekshëm kodin e vdekjes! Zoti ju ndihmoftë!
Deklaratë e Partisë Demokratike të Shqipërisë
|
|
